Masallıda kitab təqdimatı keçirilib
26-05-2025, 19:43. Разместил: admin44
Mayın 26-da Masallı rayon Mərkəzi Kitabxanasında Masallı rayon Ağsaqqallar Şurasının, Tarix-Diyarşünaslıq Muzeyinin və Masallı rayon Mərkəzi Kitabxana Sisteminin birgə təşkilatçılığı ilə “2025-ci il Konstitusiya və Suverenlik ili” çərçivəsində Ağsaqqallar Şurasının sədri, tanınmış yazıçı-publisist Ələşrəf Niftiyevin “Deyək, susmayaq” kitabının təqdimatı keçirilib. Tədbir başlamazdan öncə vətənimizin suverenliyi uğrunda canından keçən şəhidlərimizin əziz xatirəsi bir dəqiqəlik sükutla yad edilib.Tədbirdə ilk çıxış edən Masallı rayon MKS-nin direktor əvəzi Zamin Məmmədov tanınmış qələm sahibi, yazıçı-publisist Ələşrəf Niftiyevin “Deyək, susmayaq” kitabının təqdimatının “2025-ci il Konstitusiya və Suverenlik ili” çərçivəsində keçirilməsinin çox təqdirə layiq hal olduğunu bildirib. O, Ə.Niftiyevin qələmə aldığı bütün əsərlərinin kitabxanada təqdimatının keçirildiyini və bu kitabların oxucular tərəfindən çox böyük rəğbətlə qarşılandığını diqqətə çatdırıb.
Tədbirdə rayon ziyalılarından yazıçı-publisist, jurnalist-araşdırmaçı, tərcüməçi Xodaşirin Cəbiyev, Tərəqqi medallı jurnalist Əyyub Mehdiyev, əməkdar jurnalist-yazar Zakir Abbas, Qarabağ veteranları Ağsaqqallar Şurasının üzvü, Prezident təqaüdçüsü, istefada olan polis mayoru Fərhad Bağırov, Masallı Dövlət Regional Kollecinin müəllimi Nazim Əliyev, rayon Tarix-Diyarşünaslıq Muzeyinin direktoru Əntiqə Tağıyeva, Vətən müharibəsi qazisi Cavid Nuri, kitabxana əməkdaşlardan Günay Xəlilova və Gülər Piriyeva çıxışlarında yazıçının əsərlərini sevərək oxuduqlarını, sonuncu qələmə aldığı bu kitabla isə sanki dünya düzəninə səyahət etdiklərini bildiriblər.
Qeyd olunub ki, bu kitabında yazıçı dünya siyasətinə icmal verir, haqsızlıqdan ədalətsizlikdən söz açır. Tədbirdə çıxış edənlər Ə. Niftiyevi yaxından tanıdıqlarını, cəmiyyətdə yüksək mövqe qazandığını dilə gətiriblər. Vurğulanıb ki, O, əsərlərində mənəviyyata, hallalığa daha çox önəm verib. Ə. Niftiyev tədbirin təşkilatçılığına görə kitabxana rəhbərliyinə və kollektivinə minnətdarlığını bildirib. Tədbirin sonunda xatirə şəkli çəkilib.
İbrahim ŞÜKÜROV,
Masallı rayon Ağsaqqallar Şurasının mətbuat katibi.
Вернуться назад