Masallıda millət vəkili, tarix elmləri doktoru, professor Anar Camal oğlu İsgəndərovun 70 illik yubileyi qeyd olundu
İlk öncə tədbir iştirakçıları Masallı şəhər Heydər Əliyev Parkında yerləşən Ulu Öndərin abidəsini ziyarət etmişdir.
Masallı şəhər Heydər Əliyev Mərkəzində baş tutan “Tarixə həsr olunmuş ömür: Anar İsgəndərov – 70” adlı yubiley tədbiri Ulu Öndər Heydər Əliyevin, Azərbaycan Respublikasının suverenliyi və ərazi bütövlüyü uğrunda canından keçən şəhidlərimizin əziz xatirəsinin 1 dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başladı.
Tədbirin aparıcısı, Masallı Rayon Güllütəpə kənd tam orta ümumtəhsil məktəbinin Azərbaycan dili və ədəbiyyatı müəllimi Rövşən Muxtarov Azərbaycan Respublikasının Milli Məclisinin Elm və təhsil komitəsinin sədri, Yeni Azərbaycan Partiyası İdarə Heyətinin üzvü, “YAŞAT Fondu” Himayəçilik Şurasının üzvü, Azərbaycan Respublikasının Prezidenti yanında Ali Attestasiya Komissiyasının Tarix və Antropologiya üzrə Ekspert Şurasının sədri, Bakı Dövlət Universitetinin kafedra müdiri, tarix elmləri doktoru, professor Anar Camal oğlu İsgəndərovun 70 illik yubileyi münasibətilə təşkil edilmiş “Tarixə həsr olunmuş ömür” adlı təntənəli tədbirdə hər kəsi salamlayaraq bildirdi ki, bu gün biz bir ömrün mənalı yoluna nəzər salır, Azərbaycan elminə, tarixinə və ictimai-siyasi həyatına həsr olunmuş zəngin və məhsuldar fəaliyyəti böyük ehtiramla qeyd edirik.
Tədbirin davamında millət vəkili, görkəmli alim, professor Anar İsgəndərovun 70 illik ömür yolunun əsas məqamları, onun elmi-pedaqoji fəaliyyəti, ictimai-siyasi mövqeyi və Azərbaycan dövlətçiliyinə verdiyi dəyərli töhfələr əks olunmuş videoçarx nümayiş olundu.
Sonra Masallı Rayon İcra Hakimiyyətinin başçısı Araz Əhmədov yubliyarı təbrik edərək bildirdi ki, bu gün yalnız bir yubileyi deyil, eyni zamanda Azərbaycan elminə, təhsilinə və ictimai-siyasi həyatına həsr olunmuş mənalı və zəngin bir ömür yolunu qeyd edirik. Bu əlamətdar yubiley təkcə Anar müəllimin şəxsi ömür yolunun mühüm mərhələsi deyil, eyni zamanda Azərbaycan tarix elmi, milli düşüncə və ictimai fikir üçün də əlamətdar bir hadisədir. Xüsusilə qeyd etmək istərdim ki, Anar İsgəndərov Azərbaycan tarixinin mürəkkəb və taleyüklü dövrlərinin araşdırılmasında, milli yaddaşın qorunması və gənc nəslə düzgün şəkildə ötürülməsində prinsipial mövqe nümayiş etdirmişdir. Bu fəaliyyət ölkəmizdə elmin və milli ideologiyanın inkişafına mühüm töhfədir.20 monoqrafiya, 8 dərs vəsaiti və 350-dən çox elmi məqaləsi nəşr olunmuş, o, 50-dən artıq kitabın elmi redaktoru, elmi məsləhətçisi və rəyçisi olmuşdur. Anar İsgəndərovun ölkə xaricində apardığı elmi və ictimai fəaliyyət Azərbaycan tarixinin, milli kimliyimizin və dövlətçilik maraqlarımızın beynəlxalq səviyyədə tanıdılmasına xidmət edən əhəmiyyətli ziyalı missiyasıdır.O, 2011-ci ildə Castin Makkartinin ön sözü ilə ABŞ-də nəşr olunmuş "Realites of Azerbaijan: 1917–1920" əsəri ilə ABŞ Konqresi kitabxanasına daxil edilən ilk azərbaycanlı müəllifdir.
Daha sonra millət vəkilləri, Fəzail İbrahimli, Cavanşir Paşazadə, Elman Nəsirov, Məşhur Məmmədov, tarix elmləri doktoru, professor Şikar Qasımov, Yeni Azərbaycan Partiyası Masallı rayon təşkilatının sədri Seyfəddin Əliyev, Rayon Ağsaqqallar Şurasının sədr müavini, şəhid Nurlan və İntiqam Əsgərlilərin anası Ziba Əsgərli, “Masallı ziyalıları” İctimai Birliyinin sədri Qardaş Fətullayev Anar İsgəndərovun ictimai-siyasi fəaliyyəti, parlamentdəki səmərəli işi, dövlətçiliyimizə verdiyi töhfələr, elmi mövqeyi və ictimai fəaliyyəti haqqında geniş məlumat verərək yubliyara möhkəm can sağlığı və fəaliyyətində yeni nailiyyətlər arzuladılar.
Yekun olaraq söz yubilyar, millət vəkili, tarix elmləri doktoru, professor Anar İsgəndərova verilib. O, tədbirin təşkilinə görə rayon rəhbərinə təşəkkürünü bildirərək qeyd etmişdir ki, Masallı rayonunda anadan olması, bu torpağın mənəvi dəyərləri ilə böyüməsi ilə fəxr edir.
Sonda Masallı rayonunun ictimai-siyasi və elmi həyatında uzunmüddətli, səmərəli fəaliyyəti və 70 illik yubileyi münasibətilə İcra Hakimiyyəti Başçısının 28 yanvar 2026-cı il tarixli, müvafiq Sərəncamı ilə təltif olunmuş İsgəndərov Anar Camal oğluna rayon rəhbəri tərəfindən Fəxri Fərman, həmçinin Yeni Azərbaycan Partiyası Masallı rayon təşkilatının sədri Seyfəddin Əliyev tərəfindən Fəxri Fərman və hədiyyə təqdim edilmiş, xatirə şəkilləri çəkilmişdir.
