Masallıda abadlıq və xeyriyyə işləri 01-30 iyun 2025

Rayonda əhalinin sosial rifahının yüksəldilməsi və infrastrukturun müasirləşdirilməsi məqsədilə bir sıra mühüm tədbirlər həyata keçirilmişdir. Xüsusilə ərazilərdə əhalinin gündəlik həyat şəraitinin yaxşılaşdırılması istiqamətində təmir-bərpa, abadlıq, elektrik, qaz, su xətlərində təmir və yenidənqurma işləri aparılmışdır. Əkin sahələrinin suvarılmasından ötrü su kanallarının təmizlənməsi və bərpası işləri görülmüşdür. Aztəminatlı ailələrə və yardıma ehtiyacı olan şəxslərə maddi yardım göstərilmişdir.

Belə ki, Yeyənkənd ərazisində 270 metr su aparıcı kanallar təmizlənmiş, Sığdaş kəndində və Babaser kənd ümumi orta məktəbin həyətində artezian quyusu qazılmışdır. Ərkivan qəsəbəsində Zeynoba məhəllə məscidi üçün su çəni quraşdırılmışdır. Xıl ərazisində çəltik əkini ilə bağlı kanallarda qazılma və bəndləmə işləri aparılmışdır.

Masallı Elektrik Şəbəkəsi tərəfindən Hişkədərə ərazisində elektrik xətlərinə maneə yaradan ağaclar budanmışdır.

Xıl ərazisində Xıl-Sirəbil avtomobil yolunun mühafizə zolağına maneə yaradan "Aztelekom" İB və "Citynet" MMC internet provayderinə məxsus 18 ədəd rabitə dirəyinin yeri dəyişdirilmişdir. Xırmandalı kəndində Masallı Telekommunikasiya Qovşağı tərəfindən köhnə rabitə dirəkləri və xəttlərinin ərazidən çıxarılmasına başlanılmışdır.

Təklə, Bədəlan, Göyəçöl və Köhnə Alvadı ərazilərində bayraqlar yenisi ilə əvəz olunmuşdur. Banbaşı, Sərçuvar və Çaxırlı ərazisində şəhidlərin şəkili olan lövhə yenisi ilə əvəzlənmişdir. 

Hişkədərə ərazisində xeyriyyəçilər tərəfindən parkinson xəstəliyindən əziyyət çəkən  vətəndaşa 35500 manat maddi yardım göstərilmişdir. Türkoba ərazisində 11 yaşlı uşağın ürək əməliyyatı üçün 15000 manat vəsait toplanılmış və uşaq əməliyyat olunmuşdur. 

Bədəlan ərazisində aztəminatlı ailələrə ərzaq yardım olunmuşdur. Mahmudavar ərazisinin Molalan kənd məscidində təmir işləri aparılmışdır. Qızılağac kənd 2 saylı tam orta məktəbin həyətində çardaq tikilmişdir. Tüklə kənd məscidinin fasadı təmir edilmişdir. Xıl kəndində şəhid atası Aqil Nağıyev tərəfindən Xıl kənd ərazi  nümayəndəliyinin həyətində 50 metrlik hasar yenidən qurulmuş və yeni giriş qapısı quraşdırılmışdır. Yeyənkənd ərazisində məscidin qarşısında dayanacaq tikilib istifadəyə verilmişdir. Sirəbil kənd qəbiristanlığının ətrafına hasar çəkilmişdir. Xırmandalı ərazisinin Hacıtəpə kəndində xeyriyyəçilər tərəfindən qəzalı vəziyyətdə olan körpü əsaslı təmir olunmuşdur. Türkoba ərazisinin Qəzvinoba kəndində mərasim evi təmir edilmişdir. Boradigah ərazisində yol kənarı səkilərin yenisi ilə əvəzlənməsi və hasarların bərpası işləri aparılır. 

Bu kimi tədbirlər Masallı rayon İcra Hakimiyyətinin əhalinin rifahı naminə apardığı siyasətin bir göstəricisidir və gələcəkdə bu işlərin daha geniş miqyasda davam etdirilməsi nəzərdə tutulur.