Masallıda abadlıq və xeyriyyə işləri 15-31 oktyabr 2025
- 31-10-2025, 20:03
- Maraqlı
- 0
- 187
Rayonda əhalinin sosial rifahının yüksəldilməsi və infrastrukturun müasirləşdirilməsi məqsədilə bir sıra mühüm tədbirlər həyata keçirilmişdir. Xüsusilə ərazilərdə əhalinin gündəlik həyat şəraitinin yaxşılaşdırılması istiqamətində təmir-bərpa, abadlıq, elektrik, qaz, su xətlərində təmir və yenidənqurma işləri aparılmışdır. Əkin sahələrinin suvarılmasından ötrü su kanallarının təmizlənməsi və bərpası işləri görülmüşdür. Aztəminatlı ailələrə və yardıma ehtiyacı olan şəxslərə maddi yardım göstərilmişdir.
Belə ki, Masallı Su Meliorasiya Sistemlərinin İstismarı İdarəsi tərəfindən Xıl ərazisində 180 metr, Ərkivan ərazisində 150 metr və Mahmudavar ərazisində 100 metr məsafədə kanal təmizlənmişdir.
Bədəlan ərazisinin Çayqıraq kəndində xeyriyyəçilərin maddi dəstəyi ilə 400 metr məsafədə suötürücü kanal qazılmış və 4 ədəd suötürücü boru qoyulmuşdur.
Masallı rayon Elektrik şəbəkəsi tərəfindən Yeyənkənd ərazisində 1 ədəd elektrik dirəyi yenisi ilə əvəz olunmuş və elektrik xətlərinə maneə yaradan ağaclar budanmışdır.
Banbaşı ərazisinin Böyük Xocavar kəndində Masallı Qaz İstismarı İdarəsi tərəfindən qaz xətlərində təmir işləri aparılmışdır. Qəriblər ərazisinin Şıxlar kəndinə yeni qaz xəttinin çəkilişinə başlanılıb. Təzə Alvadı ərazisində qaz xəttinin çəklişi davam etdirilir.
Mahmudavar kəndinin girişində mişar daşından tanıtım lövhəsinin inşasına başlanılmışdır. Lürən ərazisində olan körpünün ətrafı təmizlənmiş və körpü rənglənmişdir. Banbaşı ərazisinin Böyük Xocavar kəndində xeyriyyəçilər tərəfindən su quyusunun yanmış motoru təmir edilmişdir.
Yeyənkənd ərazisində nümayəndəlik tərəfindən aztəminatlı ailə odun yanacağı ilə təmin olunmuşdur. Ərkivan qəsəbəsində bələdiyyə tərəfindən 5 aztəminatlı ailəyə maddi yardım göstərilmişdir. Qızılağac ərazisində bir aztəminatlı şəxsə və aztəminatlı ailəyə maddi yardım göstərilmiş, həyətinə çınqıl döşənməsi təmin olunmuşdur. Yeddioymaq ərazisində xeyriyyəçilər tərəfindən iki aztəminatlı şəxsə maddi yardım olunmuşdur. Mahmudavar ərazisində bələdiyyə tərəfindən Vətən müharibəsi iştirakçısının həyətinə çınqıl döşənmişdir. Kolatan Bələdiyyəsi tərəfindən Vətən müharibəsi iştirakçısına və aztəminatlı ailələrə maddi yardım göstərilmişdir.
